ಕಳೆದ ತಿಂಗಳ ಕೊನೆಯ ವಾರದಲ್ಲಿ, ಹಿಂದೂಗಳಿಗೆ ಪವಿತ್ರವೆನಿಸಿರುವ ಗಂಗಾ ನದಿಯ ತಟದ ಹರಿದ್ವಾರದಲ್ಲಿ ‘ಧರ್ಮ ಸಂಸತ್’ ಎಂಬ ಕಾರ್ಯಕ್ರಮ ನಡೆಯಿತು. ಅಲ್ಲಿ ವೇದಿಕೆಯಲ್ಲಿ ‘ಸಾಧು-ಸಂತ’ರೆಂದು ಕರೆಯಲ್ಪಟ್ಟ ಹಲವು ಜನ ಹಾಜರಿದ್ದು, ಹಿಂದೂಗಳು ಶಸ್ತ್ರಧಾರಿಗಳಾಗಿ ಹಿಂದೂಯೇತರರ ಹತ್ಯೆಯ ಮೂಲಕ ‘ಮತಶುದ್ಧಿ’ ಮಾಡಿ ಹಿಂದೂ ರಾಷ್ಟ್ರ ನಿರ್ಮಾಣಕ್ಕೆ ಮುಂದಾಗಬೇಕೆಂದು ಅವರು ಬಹಿರಂಗ ಕರೆ ನೀಡಿದರು. ದೇಶದಲ್ಲಿ ಹಿಂದೆಂದೂ ಇಷ್ಟು ನಿರ್ಭೀತವಾಗಿ ನೀಡಲಾಗಿರದಿದ್ದ ಸಾಮೂಹಿಕ ಹತ್ಯೆಯ ಕರೆಯಿದು. ಇದಕ್ಕೆ ಸಂಬಂಧಿಸಿದಂತೆ ಪ್ರಸಕ್ತ ಸರ್ಕಾರ ಸಂವಿಧಾನವನ್ನು ರಕ್ಷಿಸಬೇಕಾದ ತನ್ನ ಕರ್ತವ್ಯದಿಂದ ಹೇಗೆ ವಿಮುಖವಾಗಿದೆ ಎಂಬುದನ್ನು ಎ.ನಾರಾಯಣ ತಮ್ಮ ಲೇಖನದಲ್ಲಿ (ಪ್ರ.ವಾ., ಜ. 14) ವಿವರವಾಗಿ ಬರೆದಿದ್ದಾರೆ.
