ಕೈಗಾ ಉದ್ಯೋಗಿ ಸಾವು: ಮುಂದುವರಿದ ತನಿಖೆ

ಕಾರವಾರ: ತಾಲ್ಲೂಕಿನ ಕೈಗಾ ಅಣು ವಿದ್ಯುತ್ ಸ್ಥಾವರದ ಉದ್ಯೋಗಿ ಯಮನಪ್ಪ ಓಕಟನೂರು (43‌) ಸಾವಿಗೆ ಸಂಬಂಧಿಸಿದಂತೆ ಪೊಲೀಸ್ ತನಿಖೆ ಮುಂದುವರಿದಿದೆ. ಮರಣೋತ್ತರ ಪರೀಕ್ಷೆಯ ವರದಿ ಆಧರಿಸಿ ಮುಂದಿನ ಕ್ರಮವಾಗಲಿದೆ.

ವಿಜಯಪುರದವರಾಗಿರುವ ಯಮನಪ್ಪ ಅವರು ಅಣು ವಿದ್ಯುತ್ ಸ್ಥಾವರದ ಒಂದು ಮತ್ತು ಎರಡನೇ ಘಟಕದ ಎಲೆಕ್ಟ್ರಿಕಲ್ ವಿಭಾಗದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದರು. ಬುಧವಾರ ಕುಸಿದು ಬಿದ್ದು ಅವರು ಮೃತಪಟ್ಟಿದ್ದರು. ಅವರ ಸಾವಿಗೆ ಕೆಲವು ಸಹೋದ್ಯೋಗಿಗಳು ಹಲ್ಲೆ ಮಾಡಿದ್ದೇ ಕಾರಣ ಎಂದು ಆರೋಪಿಸಿ ಪತ್ನಿ ಮಲ್ಲಾಪುರ ಠಾಣೆ ಪೊಲೀಸರಿಗೆ ದೂರು ನೀಡಿದ್ದರು.

‘ಅವರು ಮೃತಪಡುವ ಸ್ವಲ್ಪ ಮೊದಲು ಸಹೋದ್ಯೋಗಿಯೊಬ್ಬರು ಜಗಳವಾಡಿದ್ದರು ಎಂಬ ಆರೋಪವಿದೆ. ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಲಾಗಿದೆ. ತನಿಖೆಗೆ ಅಗತ್ಯವಾದ ಸಾಕ್ಷ್ಯಗಳನ್ನು ಕಲೆ ಹಾಕಲಾಗುತ್ತಿದೆ. ವೈದ್ಯಕೀಯ ವರದಿಯ ಬಳಿಕ ಸಾವಿಗೆ ಕಾರಣ ತಿಳಿದು ಬರಲಿದೆ’ ಎಂದು ಡಿ.ವೈ.ಎಸ್.ಪಿ ಅರವಿಂದ ಕಲಗುಜ್ಜಿ ತಿಳಿಸಿದ್ದಾರೆ.